Кырык сирӹштӹ хынавлä - вокально-хоровой коллективвлäн семинар-практикум.
20 октябрьын 2022 ин Кырык мары районышты вокально-хоровой коллективвлäн вуйлатышывлäлäн республика кÿкшӹцäш семинар-практикум эртäрäлтӹн. Техень вäшлимäшвлä шоэн веле лиäлтӹт. Мäмнäн Кырык сирӹн культурын пäшäзӹвлäн мастралык доно пäлӹмӹм ӹштäш – тидӹ цäш.
Программа семӹнь, семинарын участниквлä пӹтäри Виловат культура томашты погыненӹт. Культура томан пäшäзӹвлä цевер шӹжӹшӹ фотозонывлäм йäмдӹленӹт, тенгеок Йоласал пäшäлӹшӹ томан мастарвлä ӹшке кид пäшäвлäштӹн выставкым ӹштенӹт.
Семинарым Кырык мары районын культура отделын вуйлатышы Наталия Константиновна Мастерова пуры шамаквлä доно пачын: «Техень кого кÿкшӹцäн семинарын участниквлäм вäшлиäш сусу ылына. Тек тагачшы кечӹ тäлäндä сусу шытырым канда. Творческий шÿлӹшӹм дä ашнымашым согоньленä».
Виловат культура томан вуйлатышы, Мары Эл Республикын культурын заслуженный пäшäзӹжӹ Валентина Михайловна Кубекова культура томан пäшä доно пäлӹмӹм ӹштен. Тенгеок семинарын участниквлäжӹ «Мыралтенä-кушталтенä» фольклорный ансамбльын творчествыжы доно пäлӹмӹ линӹт. Ансамбльын вуйлатышыжы, Мары Эл Республикын культурын заслуженный пäшäзӹжӹ Любовь Зиновьевна Соснова, кыце ансамбльышты пäшä кеä, кыце халык мырывлäм айырат, репертуарым погат, шайышт пуш.
Виловат паштек семинарын участниквлä Козьмодемьянск халаш корным кыченӹт. Кырык мары централизованный клубный системын методиствлä Тамара Викентьевна Петрова дä Елена Анатольевна Яштыкова, кыдалмы годым экскурсим эртäренӹт. Акпарсын памятник сага фотом ӹштенӹт.
А Козьмодемьянск халашты хынавлäм киндӹ-санзал доно Яков Эшпай лӹмеш халык культура центрын пäшäзӹвлä вäшлинӹт. Тенгеок «Аяр» группан (вуйлатышы Мары Эл Республикын культурын заслуженный пäшäзӹжӹ Сергей Дмитриевич Коротков) дä «Фантазия» образцовый мырышы ансамбльын (вуйлатышы Мары Эл Республикын Правительствын "Душа народа" премин лауреатшы Лолита Витальевна Кротова) ӹшке мастарлыкыштым анжыктенӹт.
Келесäш келеш, Яков Эшпай лӹмеш халык культура центрын эстрадный мырышы коллективлäм Республикышты веле агыл, а вес регионвлäштäт пäлäт. Такеш агыл, нӹнӹ «образцовый» дä «халык» лӹмӹм намалыт. Мырывлäн репертуар пиш кого. «Аяр» группын кырык марла мырывлä йонгалтыт, улы халык мырывлä дä тенгеок самодеятельный композиторын, Мары Эл Республикын культурын заслуженный пäшäзӹжӹн Владимир Евтихиевич Юшкинӹн. Халык мыры «Солаволкы кырык» семинарын участниквлäлäн пиш келшен, нӹнӹ артиствлä сагаок кырык марла мыренӹт. «Кынам ӹлянä яратымаш йäнгӹштем», «Тӹлäт йäнгем пачынам тӹнäм» дä вес мырывлääт сцена гӹцӹн йонгалтыныт.
«Фантазия» мырышы ансамбльыш школыштыш тыменьшӹвлä каштыт, изирäк группа дä когорак. Вуйлатышы Лолита Витальевна Кротова семинарын участниквлäлäн артикуляционный упражненивлäм, распевкывлäм анжыктен, дä тенгеок сцена гӹцӹн ансамбль ӹшке мырывлäштӹм йонгалтарен.
Яков Эшпай лӹмеш халык культура центрын, Кырык мары районын клубвлäн пäшäжӹ гишäн централизованный клубный системын вуйлатышыжы Дмитрий Витальевич Захаров пäлӹмӹм ӹштен. Тенгеок организаторвлä «Государственная национальная политика» Мары Эл Республикын государственный программа семӹнь эртäрäлтшӹ «Пеледӹш айо» гишäн видеофильмым анжыктевӹ. Айон тӹнг шанымашыжы – Кырык сирӹштӹ кого хорын шачмаш дä тӹдӹм ивлä гач переген кодымаш.
Вäшлимäш цилäлäн келшен. Семинар-практикум ӹшке шанымашыжым келгӹн пачын пуэн. Кечӹ тулетäн лин, шукы пуры шамакым хынавлä гӹц колмы.
Тау организаторвлäлäн, клубный системын дä культура отделын пäшäзӹвлäлäн!
Comments